APRS覆蓋測試(12)：VR2ZTK-10 Maritime Mobile 昂船洲<>西博寮海峽 @ H/L Pwr

測試日期：2013年3月18-19日
測試頻率：144.640MHz
Maritime Mobile器材：Yaesu FT8900+AVRT4 / 老鷹SG-2000

我地成日話海水係一個好好嘅Ground Plane，如果支天線可以置身喺四周景致開揚嘅海中心，咁就好無敵~咁究竟有幾無敵呢？

VR2ZTK呢兩日早上就做咗個海上測試，佢抬咗部8900上船，至於支老鷹SG-2000就直頭放咗喺船頂，做咗個海上移動嘅APRS測試。

Test 1: H Pwr

話說當日VR2ZTK-10喺朝早就開始測試，路線係由昂船洲出發，出到西博寮海峽（即係南丫島對出）兜幾個圈再返昂船洲：

由於當天朝早10點幾我要去觀塘開會，所以唔能夠上aprs.fi睇直播；不過，喺我去觀塘途中，一路都收到VR2ZTK-10嘅beacon；甚至去到觀塘某個天橋底都收到（唔好誤會我只係經過天橋底而唔係瞓喺天橋底），當時我不其然仰天長嘯：

癲架？？！！

開會時久唔久就reload一次iPhone，睇下VR2ZTK嗰幅APRS油畫畫成點嘅樣。不過原來更癲的都未出現～後來逐粒點睇返，原來VR2ZTK-10去到南丫島對出海峽時，打中晒VR2ZAC-10（西營盤）同VR2UGF-10（青衣）之餘，仲要跨過埋大老山打咗去馬鞍山嗰個VR2ZAC-1，有三個beacon係由VR2ZAC-1去處理的。

而今次呢幅APRS油畫嘅代表作，就係VR2ZTK-10去到最南端嘅幾個位置，都係經由由中山嘅digipeater BI7ILX-13幫佢relay去BI7OXI-10做IGating，佢地兩者係相距72.3km：

相傳BI7ILX-13係起喺一個山上面的，大家可以去呢度：http://aprs.fi/info/a/BI7ILX-13 睇下呢個digipeater嘅數據～

據VR2ZTK講，是次測試的SWR為1.2～

Test 2: L Pwr

第二日VR2ZTK-10同時間同路線同setting再次出海，但就改用L Pwr，睇下個Ground Plane係咪真係有咁神奇都好～

原來，呢個世界唔係有好多神奇事，轉咗L Pwr之後，所有事正常返晒：由昂船洲至青洲，都係由對正佢／較近佢嘅VR2ZAC-10做IGating。而過咗青洲之後，VR2ZAC-10都已經搞唔掂（因為VR2ZAC-10係用一條室內car-load，兩邊有個大鋁框，所以只對正前方嘅無線電波有興趣）。

過咗青洲之後，佢嘅beacon又係由70幾公里以外嘅中山digipeater BI7ILX-13幫手relay：

 

成個測試咁就完成咗啦，其中L Pwr測試我係睇住aprs.fi直播的，原來睇直播係咁過癮的~

感謝VR2ZTK恩准我將呢個測試同大家分享，謝謝啊！

APRS覆蓋測試(11)：VR2UGF-10汀九>西九龍@ 5W

測試日期：2013年3月16日
測試頻率：144.640MHz
Mobile器材：Yaesu FTM-350AR / Diamond CR77 @ 5W

又有一個新IGate啦！就係位於青衣嘅VR2UGF-10。其實呢個IGate早兩星期已經in service，我都有親身去青衣同埋荃灣玩過。不過由於其天線剛於前兩日先至正式架設（之前係臨時setting來的），所以相信今日呢個test會比之前嘅結果較有參考價值。

都叫做玩咗一排APRS，喺過程中發現其實data比起telephony QSO對訊號強度同穏定性要求更高，畢竟TNC只係一個用喺RF嘅modem，只係一台識得１同０的解碼器，你係不能夠要求佢好似人咁，就算成句冇咗兩隻字，你都可以明晒全句意思。對TNC嚟講，只要數據傳輸中一有雜訊，又或者訊號中間有半秒fading，都可能令佢全句解唔到，所以有時聽到一啲fading data聲都幾無奈，你見佢可能都有S3，用telephony QSO肯定冇問題，但個TNC就係解唔到，有時真係想去工聯會問下，有冇啲人耳1200bps數據聲解讀初階課程～

正因為以上原因，所以今次測試加入咗兩個新方法：

1. 除咗部機會定時30sec就發一次beacon之外，亦會按路程決定手動TX beacon，每次發3個beacon，希望增加成功率；
2. 車速儘量慢。因為我發現車速愈快，可能由於訊號fading愈嚴重，成功hit中IGate嘅機會明顯降低。就今次測試嚟講，行70km/h我只行50km/h；上到三號幹線都係最高只行70km/h~

話說今晚入咗元朗B仔食甜品，奉勸大家千祈唔好叫芝麻糊，開粉之餘，又太甜，好鬼膩～啊！講返個測試，今日希望先測試VR2UGF-10喺周邊沿海道路嘅覆蓋能力，所以今晚就揀一條儘量靠近海邊嘅路線，如下：

元朗＞屯門公路＞青山公路（汀九）＞海安路（即麗城花園）＞荃灣路＞三號幹線

由於預期VR2UGF-10同我個VR2ZAC-10嘅覆蓋會有重疊，所以喺元朗出發前遙控熄咗個VR2ZAC-10先。

VR2UNG-10汀九至九龍西測試

由元朗開始一直開著beacon TX，同時開住iPhone mon住aprs.fi，落到去青山公路過咗汀九橋底，見到VR2UGF-10開始接收到訊號：

一直用慢速行上述路線，久唔久就三連發beacon，總括嚟講全段路都能夠track住。而最後一個可以收到beacon嘅地方，就係三號幹線美孚對出，即係落荔枝角支路出口嘅位置：

其實喺VR2UGF-10未整好條天線時都去荃灣都做過測試，大河道同大涌道等全要路段都冇問題，相信佢已可照顧荃灣大部分地區。遲啲有時間會再做一次荃灣區測試。

APRS覆蓋測試(10)：VR2UNG-9 橫跨九龍 + 新界西@ 5W

測試日期：2013年2月7日-8日
測試頻率：144.640MHz
Mobile器材：Yaesu FTM-350AR / Diamond CR77 @ 5W

Test 1: 橫跨九龍
由於前幾日已試過在九龍西、旺角、黃埔，甚至大圍都hit得到VR2UNG-9，適逢星期四要攞我架環保之友去觀塘換偈油，於是下午就順道可以走一轉觀塘至九龍西，測試VR2UNG-9的覆蓋能否覆蓋九龍大部分地區。

今次測試係取道觀塘道＞太子道，主要原因係呢條路最唔開揚（即係地勢最低），如果呢條路係完全冇問題的話，咁即係話其餘兩條橫跨九龍嘅主要幹道：觀塘繞道（最近海邊），以及龍翔道（最高地勢）應該都冇問題。

我嘅起點係觀塘碼頭開始，終點係西九龍維港灣，成條track基本上都冇間斷過；若要雞蛋裡挑骨頭，就只係旺角警署對出一段天穚有一小段死位，但真係好細段，覆蓋真係十分完美，完美到冇嘢補充～

測試完之後大約兩小時，喺office station聽到有data聲，從aprs.fi知道原來VR2UGF-12已經從觀塘起步，正在行龍翔道向東行，同樣係以VR2UNG-9作IGate，覆蓋範圍見下圖：

Test 2: 新界西
睇返上面VR2UGF-12嘅測試，去到荔枝角對上的呈祥道就沒有在aprs.fi上面顯示，但我當時在office station仍聽到有data聲，估計係VR2UGF-12繼續發beacon但hit唔中VR2UNG-9（只能估計，因為我都係只聞其聲，我個APRSIS32都解唔到呢串data）。咁啱今日要入元朗食年夜飯，所以就由西九龍出發，途徑三號幹線直入元朗，再由元朗出返荃灣，睇睇VR2UNG-9喺呢邊嘅覆蓋係點樣。

不過今日有毛毛雨，可能對天線效能有點影響，我最後一次hit到VR2UNG-9嘅地點係南昌站對出嘅三號幹線，其後經昂船洲橋都hit唔中；出返嚟荃灣，由麗城至祈德尊一段嘅海邊都係hit唔到～不過途中遇到VR2UGF-7正在測試APRS，佢話喺青衣高樓上就可以hit得中VR2UNG-9。

有冇發覺上面張圖好亂，其實見到呢張圖真係好鬼開心，因為APRS咁繁忙嘅景象真係好少見，大家都著咗自己嘅RF或者app嘅APRS喺度測試，希望新一年會愈嚟愈多人玩APRS！

APRS覆蓋測試(9)：VR2UNG-9 九龍>沙田@ 5W

測試日期：2013年2月3日
測試頻率：144.640MHz
測試目標：九龍西 / 九龍中 / 沙田
Mobile器材：Yaesu FTM-350AR / Diamond CR77 @ 5W

自從年尾時做完一個香港九龍新界大迴環測試之後，一直都未有認真再做過任何測試，因為基本上全港大部分位置都已經做過測試，覆蓋方面已經試無可試了~

不過，我依然有開著APRS行車嘅習慣，就喺前幾日凌晨五點幾去完黃金海岸數星星渣車返歸，去到旺角144.640MHz突然出現一把機械人聲，報出V-R-2-U-N-G!!

返到Homebase立即開電腦睇aprs.fi，原來我由西環＞紅隧＞旺角＞沙田，一直都係由我個VR2ZAC-10同VR2UNG-9提供APRS服務，特別係紅隧同旺角位置，以往VR2ZAC-10係未必能夠覆蓋的，但VR2UNG-9就搞得掂！

由於VR2UNG-9十分之強橫，因此今日我就暫時QRT了VR2ZAC-10 & VR2ZAC-1兩個IGate，為VR2UNG-9進行一個最純正的測試，以了解VR2UNG-9的覆蓋範圍。但由於時間有限，今日只能試到西九龍/中九龍/沙田。

2013年2月3日下午至晚上測試VR2UNG-9

其實簡單嚟講，VR2UNG-9的覆蓋範圍超越了VR2ZAC-10，西九龍由奧運站到荔枝角都冇問題、長沙灣至深水埗內街冇問題，以住用5W hit唔到VR2ZAC-10的尖沙咀內街、黃埔、窩打老道等，VR2UNG-9都全部收得晒，強啊！

按照以上邏輯，VR2UNG-9喺大埔公路都唔會有問題的，事實亦的確如此；至於入沙田嘅最遠一點，來回各試一次，都係在大埔公路沙田花園對出~

其實一路去到火炭車廠對出，都仲收到VR2UNG-9在自動報callsign，只係我用5W不能hit中而已。

問過VR2UNG，佢話呢個IGate暫定開至2月14日，我亦會繼續測試其餘地區，因此VR2ZAC-10亦將會在此期間QRT，以作更準確測試。

APRS覆蓋測試(8)：上水＞西環 @ Mid Pwr

測試日期：2012年12月29日
測試頻率：144.640MHz
測試目標：Mid Pwr的效果
Mobile器材：Yaesu FTM-350AR / Diamond CR77 @ Mid Pwr


今日晨咁早要去觀塘接朋友去上水食早餐，晚上又約咗另一個朋友去西環食晚飯，剛好係VR2ZAC-1同VR2ZAC-10嘅覆蓋範圍。不過，其實用5W＋CR77嘅測試，都幾乎試晒香港所有地方，所以今日試試轉用Mid Pwr，睇下效果又有乜分別。

是日路徑如下：馬鞍山＞觀塘＞上水＞上環＞炮台山＞西營盤＞中環＞西環＞大圍＞馬鞍山

其實結果都唔使多講，就最遠覆蓋範圍嚟講，Mid Pwr 同 Low Pwr分別唔大，北面嘅最遠點仍然係上水至粉嶺之間；港島右手面嘅最遠點仍然係海隧附近，即係話Pwr Level對範圍嘅影響並唔大，只係令到沿途成功發出嘅beacon多咗，即係條路徑可以detail一D。

另外比較得意的事，係今晚送朋友返大圍時，喺佢樓下個停車場天橋分別hit中VR2ZAC-1同VR2ZAC-10 。

流到爆非專業結論：

再一次證實，相對Low Pwr ，其實Mid Pwr只會增加IGate成功接收beacon嘅次數，但沒有明顯增加IGate的覆蓋範圍。

APRS覆蓋測試(7)： 環遊新界@5W

測試日期：2012年12月22日
測試頻率：144.640MHz
測試目標：(1)Diamond CR77的效能、(2)上到大帽山可以上到邊個IGate、(3)VR2ZAC-1的覆蓋
Mobile器材：Yaesu FTM-350AR / Diamond CR77 @ 5W

話說上星期去咗太古城，驚覺原來世界上係有停車場嘅樓底只有1.85米高，好彩嗰日係用條有彈性嘅Diamond AZ510FX裝車尾；如果用SGM505裝車頂，恐怕未到末日先遭逢大災難；當日真係聽到條天線揩到天花嘅冷氣槽等物件，撻撻聲。

一直都好想試支Diamond CR77，因為只有29cm，我都想知佢效能係點；於是把握當日喺太古險斷天線嘅藉口啟示，第二日就convince自己走去買咗條Diamond CR77。

喺寫呢個測試之前，其實都已經用咗支CR77一個星期，效能似乎真係冇SGM505咁好，但一般都只係喺高密度地區先出事，其他行慣行熟嘅測試路線，例如大埔道、馬騮山、尖沙咀等等，都係少咗幾點，以呢幾點換嚟唔使斷天線，我覺得係fair deal咯~

趁今日要車老人家來回尖沙咀、荃灣、天水圍，於是我順手做埋測試；又見下午有時間，就一於上埋大帽山；亦見夜晚又有時間，再試埋汀角路。結果係環遊咗成個新界！

是日留下的腳印

九龍區
其實呢區唔會再有驚喜，總之成條西九龍公路、尖沙咀（彌敦道以西）、深水埗、荔枝角等位置，都可以hit到VR2ZAC-10。

新界西
其實我今日走過入天水圍兩次，分別用大欖隧道同屯門公路入去。總括嚟講，只要一過荔枝角，其實就只有以下兩點hit到VR2ZAC-10（亦即係話入到屯門元朗等地都冇APRS訊號）：

1. 麗城花園對出嘅海安路

2. 屯門公路近海堤位置

喺之前嘅測試都講過，得到呢個結果，主要係由於無論LOW/MID/HIGH，都係跨唔過青衣個地勢的。

大帽山
由天水圍繞去上水＞粉嶺＞林錦公路＞荃錦公路＞大帽山。簡單嚟講，去到上水同粉嶺中間嘅新運路，開始可以hit到VR2ZAC-1：

一直到去林錦公路前半段，都仍然hit得到VR2ZAC-1，之後訊號暫時中斷；一直去到荃錦公路近大帽山入口，就轉咗VR2ZAC-10 serve我，一直serve到上山。去到山頂停低，收到好多來自內地嘅beacon，有發message畀佢地，可惜冇QSL。

而上到山頂停低之後，竟然又變返VR2ZAC-1 serve我。其實呢個位靚嘅程度僅次於VR2R，相信香港九龍新界任何一個IGate、甚至乎任可一部手機都可以同我simplex QSO，我會再研究點解會係VR2ZAC-1 serve我，而唔係一路上山都用緊的VR2ZAC-10。

大帽山山頂hit中VR2ZAC-1

新界東
路徑係由吐露港公路＞汀角路＞新娘潭路＞鹿頸＞沙頭角公路＞粉嶺＞吐露港公路，呢條路徑係專為測試VR2ZAC-1而設。

基本上由吐露港公路，去到汀角路都完全hit得到VR2ZAC-1，直到上新浪潭路受到山勢遮擋，就hit唔到了。其實之前都用SGM505做過一次VR2ZAC-1嘅測試，而今次效果大致相同，只係用SGM505，喺新浪潭道前一小段都仲可以hit多次VR2ZAC-1而已，天線由53cm縮到家陣嘅29cm，將就下都要啦～

當然，入到去鹿頸同沙頭角公路就影都冇啦，一直出返上述粉嶺新運路附近（我當時係在沙頭角公路尾），又開始可以hit得到VR2ZAC-1；之後成段粉嶺公路都冇問題，但係吐露港公路太和至大埔一段山路，就暫時失去聯絡（如用SGM505就冇問題...再講多次，支天線咁短，將就下都要啦～）。

另外，早一晚亦走咗一轉西貢，測試VR2ZAC-1最遠可以去到西貢邊度。由於呢個方向係VR2ZAC-1嘅背面，入唔到西貢就預咗，但都去到西沙路上斜靠海位置：

以前用AZ510FX同SGM505都做唔到咁遠，而呢支神奇的CR77竟然做到。

流到爆非專業結論
呢支CR77其實效果係好驚喜，一方面係一啲大路嘅地區，例如深水埗內街、尖沙咀內街等，佢都畀唔到訊號VR2ZAC-10，即係話呢方面係比SGM505差。但另一方面，西沙路、上水等地，以前用5W做唔到的，但CR77卻做得到，真係好神奇，好好玩，因為真係估佢唔到～

而最重要，佢只有29cm，可以放車頂，大大增加天線效率；亦可以安全進出太古城中心停車場～

買呢支CR77嘅同時，順手訂埋另一支好想試嘅SGM507，不過要等到一月中先至送到。到時試下裝車頂，睇下又有乜效果。不過，SGM507肯定入唔到太古城停車場，因為有成79cm咁長！

大帽山測試實況

附送新鮮撞板日記一則
另外，今日又撞板，話說上大帽山時，有對頭車，我要倒車落山。倒倒下我感覺好似撞到Ｄ有彈性嘅嘢，呢個感覺似曾相識，因為呢個就係我架車個沙板！雖然只係花咗Ｄ，但對於一個完美主義者嚟講，發生咗呢件事而又唔去處理，個心係會好唔舒服的。唉～我唔銀想又去整呀，一整又會冇咗部Yaesu VX3架啦！！

APRS覆蓋測試(6)： VR2VOI-10、VR2JAM 東九龍@ 5W

測試日期：2012年12月11日
測試頻率：144.640MHz / VR2JAM (435.550MHz, -5.00MHz, CT110.9Hz)
測試目標：東九龍>清水灣道
Mobile器材：Yaesu FTM-350AR / Diamond SGM505 @ 5W

今日另一個OT3m終於寄到嚟，開完會食完飯好心急返馬鞍山裝VR2ZAC-1，但又身痕想試東九龍至西貢的APRS覆蓋。

之不過，其實係有兩個IGate都可以照顧到東九龍的：VR2VOI-10 & VR2JAM，原本應該要走兩轉，分別測試（因為兩個IGate係不同freq），但又實在太心急，於是我就諗到一個極縮骨高效率的快測方法：每一個freq出兩次beacon，然後立即QSY去另一freq，不斷梅花間竹，狀態甚忙～目標都係想知現存的IGate，可以覆蓋到清水灣邊個位置。

我架VR2ZAC-9由西九龍出發，先同我個VR2ZAC-10打招呼，果然「5火不過窩打老道」已成為VR2ZAC-10的宿命。去到九龍城附近，聽到好多data聲，原來係VR2UNV在附近試APRS，於是我地又QSO了一陣，上到觀塘繞道，就開始測試了。

太子道東上觀塘繞道之後，兩個IGate合作，一路track住我；我繼續途經將軍澳道，左轉去秀茂坪道，再行新清水灣道，最後可hit到IGate的位置，係新清水灣道橋面，即係呢度：

PS1：今日測試途中，先後同VR2UNV、VR2TYL、VR2UNG做了QSO，大家都係因為聽到data聲而叫QRZ的；而返到馬鞍山set IGate之後，又收到VR2VOI同埋VR2UNV嘅APRS message，我從未試過玩APRS時同咁多ham QSO，多謝各位！

PS2：今日首次遇上嚿18Ah SLA電池乾塘，部機講講下自己熄咗！原本喺馬料水收到VR2UNV call，但都冇電回覆，一撳即熄，再撳再熄...sosad～睇嚟我實在發得太多beacon，同埋我諗我以後要一星期充一次電~

APRS覆蓋測試(5)：VR2JAM (Voice Repeater) 九龍@ 5W

測試日期：2012年12月5日
測試頻率：VR2JAM (435.550MHz, -5.00MHz, CT110.9Hz)
測試目標：環繞九龍一周
Mobile器材：Yaesu FTM-350AR / Diamond SGM505 @ 5W

今日中午返到office，先至睇到原來VR2VOI-10 send咗個APRS message嚟，話voice repeater VR2JAM正在測試APRS。剛好下午要過九龍，於是就開始咗呢個失驚無神的測試之旅。

印象中VR2JAM個coverage係幾好的，好多度都收到，不過由於唔常用，究竟有冇死位，真係未知。

是次路徑為：大角咀＞旺角＞尖沙咀＞紅磡＞何文田＞九龍城＞觀塘繞道＞觀塘道＞彩虹＞龍翔道＞深水埗

下午四點幾，九龍好塞車，所以好多beacon都粘埋一嚿

其實今次唔使寫好多字，因為以上地區、包括內街與天橋底，我從未同VR2JAM失去聯絡；喺上面個圖你或者會發現，何文田＞九龍城，以及彩虹＞九龍塘，都係冇beacon的，原因同coverage係冇關，而我今次亦冇乃嘢，主要原因：

(1) 何文田＞九龍城：我正在測試CTCSS的delay問題，即係究竟個TX要delay幾耐，先至可以令beacon data完全被VR2JAM接收（不過諗諗下其實今次係要試coverage，後來如夢初醒，都係將TX delay set返去default的1000ms，CTCSS delay嘅問題稍後再試）

(2) 彩虹＞九龍塘：我正在跟VR2UNG透過VR2JAM QSO，哈哈～

VR2ZAC-9在VR2JAM上的APRS記錄（由VR2UNG提供）

流到爆非專業結論：
總括而言，VR2JAM喺九龍區嘅覆蓋超好，唯一搵到較弱嘅地方，就係龍翔道近廣播道上斜一帶，但都有S3的~

APRS覆蓋測試(4)：VR2ZAC-10(新天線)、VR2VOI-10 港島＞馬鞍山＠5W

測試日期：2012年11月20日
測試目標：全港島＋九龍（窩打老道以西）
IGate器材：FT-2600M / Diamond MC-101S / OT3m / APRSIS32
Mobile器材：Yaesu FTM-350AR / Diamond AZ510FX @ 5W

舊：2012年11月10日測試 (Diamond NR7700 @ High Power)

其實早前已經買咗一支VHF 5/8天線，不過由於呢一支係commercial antenna (Diamond MC-101S)，預設頻率範圍係136-174MHz，因此需要自行鋸到適合144MHz用。關於支天線的特性，5/8冇地網設定要如何set、我做setting又如何乃嘢等，留待之後另文才寫。

今次測試，主要係想知set好呢支好銀麻煩嘅室內5/8天線之後，VR2ZAC-10嘅覆蓋有乜分別。所以基本上係圍繞港島一圈，再試埋九龍區嘅左面，以窩打老道為界。而結果顯示，即使轉用5W，效果都係好咗！

新：2012年11月20日測試 (Diamond MC-101 @ 5W)

港島區覆蓋情況
1. VR2ZAC-10由西環域多利道至灣仔會展都可以大致覆蓋
2. 至北角城市花園以東，就由VR2VOI-10接手，一直至柴灣道接大潭道口
3. 銅鑼灣至天后一帶，仍然是APRS嘅真空帶

九龍區覆蓋情況
1. 西九龍當然冇問題
2. 荔枝角青山道工廠區一帶完全冇問題
3. 由紅隧＞公主道＞窩打老道完全冇訊號，要去到九龍塘浸大附近轉落龍翔道一段才幸運地hit中一次
4. 大埔公路去到shell油站附近

流到爆非專業結論
簡單來講，呢支5/8 VHF天線，的確比以前用開嘅1/2 Dual Band（Diamond NR7700）天線效果更好，所以會繼續用來做IGate~

題外話
測試當日，晚上在office時，突然聽到部IGate傳來data聲，立即開APRSIS32個windows睇下有邊個喺附近，原來係來自德國DO5CO-5！原來佢係坐住貨輪而來，用Kenwood D72 HT，只來香港一晚，第二朝就走咗咯～

VR2ZAC-10接收DO5CO-5 beacon路程全紀錄

APRS覆蓋測試(3)：VR2ZAC-10 荃灣＞屯門＞金山@5W

日期：2012年11月12日

測試目標：荃灣+屯門
IGate器材：FT-2600M / Diamond NR7700 / OT3m / APRSIS32
Mobile器材：Yaesu FTM-350AR / Diamond AZ510FX @ High power (去程) /  5W (回程)


返工途中突然身痕想試VR2ZAC-10去唔去到屯門，於是行完大埔公路、見到深水埗時急轉彎向右，向屯門出發！

測試路徑：沙田＞大埔公路＞呈祥道＞葵涌道＞荃灣路＞屯門公路

入去嘅時候，當然係開盡power，因為我都唔知hit唔hit到。雖然開盡晒，但都要去到葵涌路見到青衣南橋先至hit到IGate一次。去到麗城花園對上屯門公路，hit多次，成條屯門公路總共hit到三次，最遠係位於海邊、入小欖之前嘅一段：

之後我繼續入去屯門海榮路，呢度係屯門南面最近海的地方，可惜都hit唔到。

回程，既然都已經試咗High Power，不如出九龍又試下5W，一雞兩味，唔好浪費咗D汽油。整體嚟講，5W同High Power，喺屯門公路上，係。。。完。全。冇。分。別！

流到爆非專業結論：
1. 返到公司詳細睇下個aprs.fi紀錄，發現屯門公路hit到嘅三個地點，其實對出都係一望無際，所以我途徑青衣北面就冇訊號，而再遠Ｄ，就會畀大嶼山遮住。

2. 最遠hit到嘅一個地點，如果對住VR2ZAC-10劃一直線，就會發現其實係僅僅經過大嶼山的平地，再過就已經畀個山遮住咯。

3. 另一個發現，就係海水的ground plane作用真係好勁，5W同high power的表現無異。

4. 至於hit唔到的地方，由於都係受山勢遮擋，即係high power根本唔可以幫我越過高山又越過谷。

APRS覆蓋測試(2)：VR2ZAC-10 九龍>馬鞍山＠25W

日期：2012年11月11日

測試目標：西九龍＞尖沙咀＞黃埔花園內街＞紅磡碼頭＞公主道＞衛理道＞旺角＞深水埗＞大埔道＞沙田＞馬鞍山
IGate器材：FT-2600M / Diamond NR7700 / OT3m / APRSIS32
Mobile器材：Yaesu FTM-350AR / Diamond AZ510FX @ 25W

基於昨日的第一次APRS測試，已經掌握九龍部分地區的覆蓋情況，於是今次將輸出調至25W，係下又有乜分別。

西九龍同西營盤咁friend，VR2ZAC-10好肯定係覆蓋到的。入到尖沙咀柯士甸道都冇問題，但一轉入彌敦道，就立即同VR2ZAC-10失去聯絡，途徑寶勒巷順手食串魚蛋同栢葉，呢度冇signal，出到漆咸道一樣冇，一直要上到火車站暢運道條天橋，先至再次hit得中。

全個黃埔區冇反應，諗住盡地一煲去紅磡碼頭停低抖下，順手又試下，竟然OK喎！全紅磡真係得呢度hit到～

公主道完全冇問題，但估唔到全條衛理道都OK! 再入洗衣街、出番亞皆老街，右轉彌敦道，直剷大埔道，再夜探馬騮，都完全冇間斷。

大埔道最後hit中位置：

同樣地，去到馬鞍山濾水廠對上天橋，我又hit中了VR2ZAC-10，不過今日冇咁驚喜，只係知道原來25W已經做到～

流到爆非專業結論：

雖然兩日測試的路徑唔係好一樣，不過單睇大埔道同馬鞍山兩個結果，兩者落點大致相同，唔見因為用25W就冇咗一截。即係話，25W同50W的效果，其實係差唔多。

APRS覆蓋測試(1)：VR2ZAC-10、VR2VOI-10 港島＞馬鞍山@High Power

測試日期：2012年11月10日
測試目標：全港島
IGate器材：FT-2600M / Diamond NR7700 / OT3m / APRSIS32
Mobile器材：Yaesu FTM-350AR / Diamond AZ510FX @ High Power

話說個OT3m送來之後，原本滿心歡喜在當晚回homebase途中測試VR2ZAC-10，呀～點知我又乃咗嘢，又set錯嘢，所以開台紀念測試日遲了一天先至進行。

適逢星期五晚，加上有個靚女普通朋友話想去周圍兜下，兩強而有力嘅原因，令VR2ZAC-10開台後首次測試，就係一次通頂環島遊，又可以順手試埋VR2VOI-10。

由於係第一次測試，對coverage完全冇concept，所以是次係用high power @ 12V進行，請大家自己用心目中的公式化為Watt數，thank you～當晚我係由佐敦出發，途經紅隧過香港島，再以順時針方向圍繞港島一個圈。

佐敦要hit中VR2ZAC-10完全冇問題，但去到加士居道就收唔到，直到過海後，去到北角城市花園對出的東區走廊，aprs.fi先至見到自己，原來係港島東的VR2VOI-10 hear到我。

入到去柴灣，即係VR2VOI-10主場，就繼續由佢射住我，一直去到石澳海灘，再繼續西移至爛泥灣對上的石澳道都冇問題。

不過訊號始終敵不過大潭道，未去到已經blackout了。一直未見起色，唯有去赤柱食杯雪糕振奮一下。

繼續沿海行，去到數碼港對上一段薄扶林道終於又同我個VR2ZAC-10傾到計，因為太過開心，狂撳beacon TX掣，又不斷reload aprs.fi.....啊，原來頭先嗰個只係奇蹟；第二個beacon，要去到摩星嶺對出的域多利道先至收到。

繼續向東行，一路有訊號，但竟然去到上環信德對出就無影！簡直大打擊啊！我地頭，竟然冇影？係，事實就係咁，過海返九龍，要去到旺角先至開始再hit到VR2ZAC-10。

上大埔公路返新界，可能由於地勢高，長hit長有；不過落到沙田又冇影了～算啦，預咗～

驚喜總是突如其來的，正當我過馬鞍山濾水廠對上一條橫跨城門河的橋時，竟然hit中VR2ZAC-10幾次！

我諗係由於地勢高（天橋），再加上呢個位同VR2ZAC-10拉直線時，係會先經過完全冇樓宇的城門海（完全平行），再經過一個valley（即係連山形都幫埋我），是為測試中的第一大奇蹟（因為先前在數碼港hit中ZAC-10已即時被列為第二大奇蹟，點都唔及呢個奇呀嘛）。

返到homebase，已經係凌晨5:00幾，本應係去食一個M記早餐的好時機（24小時M記的早餐係4:00am開始供應的），但實在好鬼攰，早餐都食唔落就瞓覺咯～